கேரள அரசைக் கண்டித்து பேரணி நடத்திய விவசாயிகள்*
கூடலூர்: முல்லைப் பெரியாறு அணையை இடித்துவிட்டு புதிய அணை கட்ட திட்டமிடும் கேரள அரசைக் கண்டித்து தேனி மாவட்டத்தின் தமிழக எல்லையான லோயர் கேம்பில் விவசாயிகள் சார்பில் கண்டன பேரணி நடைபெற்றது.
முல்லைப் பெரியாற்றில் புதிய அணை கட்ட அனுமதி கேட்டு கேரள அரசு கடந்த ஜனவரியில் மத்திய சுற்றுச்சூழல் மற்றும் வனத்துறை அமைச்சகத்திடம் மனு அளித்தது.
”முல்லைப் பெரியாறு அணை கட்டப்பட்டு 128 ஆண்டுகள் ஆகிவிட்டதால் அணையின் கீழ்ப்பகுதியில் வசிக்கும் ஆயிரக்கணக்கான மக்கள், வனவிலங்குகளின் உயிருக்கு அச்சுறுத்தல் உள்ளது.
“எனவே, தற்போதுள்ள அணைக்கு 1,200 அடிக்குக் கீழே புதிய அணையை கட்டிய பின், பழைய அணையை இடிக்க அனுமதி வேண்டும்,” என்று அந்த மனுவில் குறிப்பிடப்பட்டு இருந்தது.
இந்த மனுவை ஆய்வு செய்த அமைச்சு, அதை நிபுணர் மதிப்பீட்டுக் குழுவுக்கு மே 14ஆம் தேதி அனுப்பியது. இது தொடர்பான கூட்டத்தை மத்திய அரசின் நிபுணர் மதிப்பீட்டுக் குழு செவ்வாய்க்கிழமை (மே 28) நடத்த உள்ளது.
இந்நிலையில், முல்லைப் பெரியாறு அணையை இடித்துவிட்டு புதிய அணை கட்ட திட்டமிடும் கேரள அரசைக் கண்டித்து தமிழக விவசாயிகள் திங்கட்கிழமை (மே 27) காலை தமிழக எல்லையான லோயர் கேம்பில் இருந்து முல்லைப் பெரியாறு அணை நோக்கி பேரணியாகக் கிளம்பினர்.
ஆனால், விவசாயிகள் கர்னல் ஜான் பென்னிகுவிக் மணிமண்டபம் அருகே வந்தபோது காவல்துறையினரால் தடுத்து நிறுத்தப்பட்டனர்.
போராட்டம் நடைபெற்ற வேளையில் பெரியாறு வைகை பாசன விவசாயச் சங்க ஒருங்கிணைப்பாளர் அன்வர் பாலசிங்கம் செய்தியாளர்களிடம் பேசினார்.
அப்போது அவர் கூறுகையில், “தற்போது அணையின் நீர்மட்டத்தை 152 அடியாக உயர்த்த வேண்டும் என்று தமிழக விவசாயிகள் வலியுறுத்தி வரும் வேளையில், கேரளா புது அணை என்பதில் பிடிவாதமாக இருப்பது 152 அடிக்கு முட்டுக்கட்டை போடுவதற்காகத்தான்.
“முல்லைப் பெரியாறு அணையை இடிக்க நினைக்கும் கேரளாவின் கனவு ஒருபோதும் பலிக்காது,” என்றார்.